19 января 2022
Бясспрэчныя прыярытэты. Таццяна Філімонава размаўляе з карэспандэнтам газеты «Культура»
Старшыня Беларускага прафесійнага саюза работнікаў культуры, інфармацыі, спорту і турызму Таццяна Філімонава:— Для мяне галоўным з’яўляецца тое, што Канстытуцыя захоўвае і нават узмацняе сацыяльную накіраванасць: гарантуецца бясплатная адукацыя і ахова здароўя, падтрымка сем’яў з дзецьмі, інвалідаў. Асабліва хочацца звярнуць увагу на дапаўненні ў 54 артыкул Канстытуцыі: “Праяўленне патрыятызму, захаванне гістарычнай памяці аб гераічным мінулым беларускага народа з’яўляюцца абавязкам кожнага грамадзяніна Рэспублікі Беларусь”. З аднаго боку, здавалася б, усім зразумелыя бясспрэчныя прыярытэты, якія ў абавязковым парадку павінны прысутнічаць у жыцці кожнага грамадства. Але, на жаль, у сучасным свеце наша краіна сутыкнулася з сур’ёзнай праблемай навязвання з-за чужой ідэалогіі, культуры, са спробамі скажэння нашай сапраўднай гісторыі. Дапусціць гэтага нельга, бо народ, які не мае гісторыі, не мае будучыні. Такім чынам, вельмі важна, што патрыятызм і абавязак кожнага грамадзяніна краіны па захаванні гістарычнай памяці аб гераічным мінулым беларускага народа замацаваны ў Асноўным Законе краіны.
Акрамя таго, на дадзеным гістарычным этапе развіцця Рэспублікі Беларусь вельмі актуальна ўнясенне ў праект Канстытуцыі нормы, якая абавязвае бацькоў не толькі выхоўваць дзяцей, клапаціцца аб іх здароўі, развіцці і навучанні, але і “рыхтаваць да грамадскай карыснай працы, прывіваць культуру і павагу да законаў, гістарычных і нацыянальных традыцый”. Паўнавартаснае выхаванне, накіраванае на гарманічнае развіццё дзіцяці, немагчымае без знаёмства яго з культурай і традыцыямі роднага краю, без выразнага ўсведамлення і пераканання ў неабходнасці выканання законаў сваёй краіны і, вядома ж, без павагі і захавання гісторыі. Бо ўсім вядомая ісціна: тое, што закладзена ў чалавеку з дзяцінства, з’яўляецца падмуркам для далейшага развіцця і станаўлення асобы.
«Культура»
№ 3 (1546) 15.01.2022 — 21.01.2022 г.
Подписывайтесь на наш Telegram-канал
t.me/belprofkult_inform_sport_turizm
